الحلم

راحت تنام , وقلت تصبح على خير
يا عيون عذبها السهـر ثـم نامـت
تلحفت بالصبـح مثـل العصافيـر
وتمددت فوق السريـر , وترامـت
كان المسا سهران يعـزف تباشيـر
ويوم ارتخى عطر البساتين هامـت
راحت تغيب وترتفع كنّهـا الطيـر
والأرض من هيبة حلاهـا تسامـت
مثل الفراش تلامس الغيم , وتطيـر
تغيب في قلبي وإذا غبـت حامـت
معشوقة الأحلام , بنـت الأساطيـر
اللي ليا دارت مع الجـول شامـت
فيني تسافر , تختصرني مشاويـر
وأنا أختصرها شعر , وأشياء غامت
ليت المسا يمطر عبيـر ومساييـر
وليت السوالف لا غفى الليل دامـت
لا واهنيّـك يـا سريـر الأزاهيـر
اللي عليك أنشـودة الحلـم نامـت